2012/12/14
懷念媽媽
今仔日上畫圖課,老師叫大家選一個人物來畫,順續描寫彼個人ㄟ一寡代誌。
汝敢知影?媽媽~~馬上浮出佇阮眼前ㄟ就是汝慈祥ㄟ面容,阮親愛ㄟ媽媽。
媽媽,雖然汝離開阮去佛祖ㄟ身邊將近十年,但是佇阮ㄟ心肝內,
汝親像並無離開同款,阮不時就會想著汝。
透早照著窗邊溫暖ㄟ太陽阮就來想起汝開朗ㄟ笑容,
暗暝看著天上柔美ㄟ月娘阮就懷念著汝溫柔ㄟ話語,
掀著汝抄寫ㄟ歌本,親像擱聽著汝快樂美妙ㄟ歌聲,
看著汝ㄟ相片,阮目屎流袜離。
媽媽,阮親愛ㄟ媽媽,阮真思念汝,汝敢知影?
前幾日阮佇一場演唱會聽著一首歌,阮ㄟ目眶馬上紅起來,
阮現在就來唱乎汝聽。媽媽,這首歌叫做~天頂ㄟ星。
天頂的星 詞曲:鄭智仁
天頂的星,親像媽媽您,溫柔的目賙
看阮歡喜,伴阮傷悲,率阮行過暗瞑
天頂的星,親像媽媽您,美麗的目賙
有時歡喜,有時傷悲,青春無悔的歲月
感謝您牽阮的手,媽媽 感謝您乎阮的愛
暗瞑尚光尚光彼粒星,親像就是媽媽您
訂閱:
張貼留言 (Atom)
沒有留言:
張貼留言